نیوزنور newsnoor

 نیوزنور31جولائی/جسٹس فار فلسطین نامی چوتھی کانفرنس کے شرکاء نے اس بات پر زور دیا ہے کہ امریکی منصوبہ سنچری ڈیل کبھی بھی کامیاب نہیں ہوسکے گی۔

عالمی اردو خبررساں ادارے’’نیوزنور‘‘کی رپورٹ کے مطابق لبنان کے دارالحکومت بیروت میں جسٹس فار فلسطین کے زیرعنوان منعقدہ چوتھی کانفرنس کے شرکاء نے کہا ہے کہ فلسطین کے خلاف امریکی منصوبہ سنچری ڈیل ناکام رہےگی۔

کانفرنس میں تقریر کرتے ہوئے فلسطین کے عیسائی مذہبی رہنما اور اسقف اعظم عطااللہ حنا نے کہا کہ سنچری ڈیل میں فلسطینی کاز کو نشانہ بنایا گیا ہے لیکن یہ منصوبہ ہرگز کامیاب نہیں ہوگا۔

کانفرنس میں تقریر کرتے ہوئے بیرون ملک مقیم فلسطینیوں کی کانگریس کے جنرل سکریٹری ھشام ابو محفوط نے دیگر ملکوں میں مقیم فلسطینیوں پر زور دیا ہے کہ وہ سنچری ڈیل منصوبے کو پوری قوت کے ساتھ ناکام بنادیں۔

 انہوں نے فلسطینی انتظامیہ اور عرب حکومتوں پر زور دیتے ہوئے کہا کہ وہ صیہونی حکومت کو تسلیم کرنے کے اپنے فیصلے پر نظر ثانی کرتے ہوئے اوسلو کے منحوس معاہدے کو بھی کالعدم قرار دیں۔

دوسری جانب صیہونی حکومت کے شہری امور کے وزیر یو گالانت نے النقب کے عرعرہ علاقے میں صیہونی انتہا پسندوں کے لئے دوہزار مکانات کی تعمیر کا منصوبہ پیش کردیا ہے مذکورہ صیہونی وزیرنے کہا ہے کہ اس علاقے میں فلسطینیوں کا کنٹرول ختم کرنے کے لئے صیہونی بستیوں کی تعمیر اور صیہونیوں کے لئے نئے مکانات تیار کرنا ضروری ہے۔

یہ ایسی حالت میں ہے کہ اقوام متحدہ نے اپنی متعدد قراردادوں میں فلسطینی علاقوں میں صیہونی بستیوں کی تعمیر کو غیر قانونی قراردیا ہے۔

یاد رہے کہ سنچری ڈیل منصوبہ فلسطینی کاز کے خلاف ایک نیا امریکی منصوبہ ہے جس میں فلسطینیوں کو ان کے حقوق سے محروم کرنے کی بات کی گئی ہےکہا جارہا ہے کہ یہ منصوبہ علاقے کی بعض عرب حکومتوں کے ساتھ مل کر بنایا گیا ہےسنچری ڈیل کے تحت بیت المقدس کو صیہونی حکومت کے حوالے کردیا جائے گا اور دیگر ملکوں میں مقیم فلسطینی پناہ گزینوں کو واپس فلسطین لوٹنے کا حق نہیں ہوگا۔

واضح رہے کہ سنچری ڈیل کے مطابق غرب اردن اور غزہ میں جو زمینیں باقی رہ گئی ہیں صرف انہی پر فلسطینیوں کا اختیار رہے گا اسی سنچری ڈیل کے تحت ہی امریکی صدر ٹرمپ نے چھے دسمبر کو بیت المقدس کو صیہونی حکومت کا دارالحکومت قراردے کر امریکی سفارتخانہ تل ابیب سے بیت المقدس منتقل کرنے کا فیصلہ کیا تھا۔