ہوائی اڈے پر یمنی فوج کے ڈرون حملے سے ابو ظہبی پر خوف طاری ہوگیا ہے
یمنی ذرائع ابلاغ :
نیوزنور27جولائی/یمنی ذرائع ابلاغ نے اپنی ایک رپورٹ میں کہا ہے کہ یمنی فوج کے ڈرون طیارے نے ابوظہبی کے بین الاقوامی ہوائی اڈے پر حملہ کیا ہے جس کے بعد اس ہوائی اڈے پر پروازوں کی آمد و رفت روک دی گئی ہے۔
عالمی اردو خبررساں ادارے’’نیوزنور‘‘کی رپورٹ کے مطابق یمنی ٹی وی چینل ’’المسیرہ ‘‘نے اپنی ایک رپورٹ میں کہا کہ یمنی فوج کے ڈرون یونٹ نے صماد تین نامی اپنے ڈرون طیارے کے ذریعے ابوظہبی کے بین الاقوامی ہوائی اڈے پر کئی بار حملہ کیا ہے اور اس حملے کے بعد ابوظہبی کے بین الاقوامی ہوائی اڈے پر پروازوں کی آمد و رفت روک دی گئی ہے۔
رپورٹ میں کہا گیا ہے کہ ابوظہبی ہوائی اڈے کی انتظامیہ نے واقعے کو ایک حادثے کا نام دیتے ہوئے اعتراف کیا ہے وہ صورتحال پر متعلقہ حکام کے ساتھ مل کر قریب سے نظر رکھے ہوئے ہے۔
رپورٹ میں کہا گیا ہے کہ ابوظہبی ہوائی اڈے کی انتظامیہ نے اپنے ٹوئٹر پیج پر حملے کے موقع پر لکھا ہے کہ ہوائی اڈے کی انتظامیہ مقامی وقت کے مطابق شام چار بجے رونما ہونے والے واقعے کی تصدیق کرتی ہےاورانتظامیہ نے دعوی کیا کہ حادثہ ہوائی اڈے کے فنی عملے کی ایک گاڑی کی وجہ سے ہوا ہے اور پروازوں کی آمد و رفت پر اس کا کوئی اثر نہیں پڑا ہے۔
رپورٹ میں کہا گیا ہے کہ ڈرون حملے کے بعد ابوظہبی ہوائی اڈے کا فلائٹ آپریشن روک دیا گیاہے اورابوظہبی ہوائی اڈے کی سرگرمیاں ڈرون حملے کے بعد معطل ہوگئی ہیں۔
واضح رہے کہ اس سے پہلے یمنی فوج کی بحریہ نے گذشتہ چوبیس گھنٹے میں سعودی عرب اور اس کے اتحادیوں کے دو بحری جہازوں کو یمن کے مغربی ساحلوں پر نشانہ بنایا تھا جس کے بعد سعودی عرب نے آبنائے باب المندب کے راستے اپنے آئل ٹینکروں کو کچے تیل لے کر گذرنے سے روک دیا ہے۔
