غزہ کا مستقبل فلسطینی ریاست کا حصہ ہوگا
اقوام متحدہ کے سیکرٹری جنرل :
نیوزنور16فروری/اقوام متحدہ کے سیکرٹری جنرل نے فلسطین کے محصور علاقے غزہ پٹی میں جاری معاشی بحران اور اسرائیلی پابندیوںکی وجہ سے پیدا ہونے والی مشکلات کا حل نکالنے پر زور دیا ہے۔
عالمی اردو خبررساں ادارے’’نیوزنور‘‘کی رپورٹ کے مطابق اقوام متحدہ کی فلسطین سے متعلق کمیٹی کے اجلاس سے خطاب کرتے ہوئے ’’انتونیو گوٹیرس‘‘ نے کہا کہ غزہ کا علاقہ مستقبل میں وجود میں آنے والی مجوزہ فلسطینی ریاست کا حصہ ہوگا۔
انہوں نے خبردار کیا کہ غزہ پٹی کی صورت حال انسانی المیے کی طرف بڑھ رہی ہے۔
انہوں نے کہا غزہ میں بسنے والے دو ملین فلسطینیوں کو باعزت زندگی گذارنے کا حق ہے اور کسی کو یہ حق حاصل نہیں کہ وہ غزہ کے عوام کو مشکلات سے دوچار کرے۔
انہوں نے اسرائیل پر زور دیا کہ وہ غزہ پٹی میں بنیادی انسانی ضرورت کی اشیاء کی ترسیل کی اجازت دینے کے ساتھ غزہ کے عوام کی نقل وحرکت کی اجازت دے تاکہ بے روزگاری کے خاتمے اور علاقے میں معاشی بحران کے حل کی راہ ہموار ہوسکے۔
اقوام متحدہ کے سیکرٹری جنرل نے اسرائیل پر زور دیا کہ وہ غزہ میں پرامن مظاہرےکرنے والے فلسطینیوں کے خلاف طاقت کے اندھا دھند استعمال سے گریز کرے اور مظاہرین سے نمٹنے کے لیے بین الاقوامی قوانین کا احترام یقینی بنائے۔
انتونیو گوٹیرس نے مزید کہاکہ یہ بدقسمتی ہے کہ غزہ میں احتجاجی مظاہروں اور ریلیوں کےدوران اسرائیلی فوج کے طاقت کے استعمال سے سیکڑوں فلسطینی شہید اور ہزاروں زخمی ہوچکے ہیں۔
