ایران جوہری معاہدے پر مسلسل عمل کررہا ہے
آئی اے ای اے کے سربراہ:
نیوزنور31جنوری/عالمی جوہری توانائی ادارے (IAEA) کے سربراہ نے ایک بار پھر جوہری معاہدے سے متعلق ایران کی جانب سے شفاف کارکردگی کا سلسلہ جاری رکھنے کی تصدیق کی ہے۔
عالمی اردو خبررساں ادارے’’نیوزنور‘‘کی رپورٹ کے مطابق عالمی جوہری توانائی ادارے (IAEA) کے سربراہ ’’یوکیو امانو‘‘نے نئے عیسوی سال کی مناسبت سے ایک تقریب سے خطاب کرتے ہوئے کہاکہ ایران جوہری معاہدے پر مسلسل عمل کررہا ہے۔
انہوں نے کہا کہ ایران اور شمالی کوریا کی جوہری سرگرمیاں عالمی جوہری ادارے کی پہلی ترجیح ہیں۔
موصوف سربراہ نے کہا کہ عالمی ادارے کی جانب سے ایران کی جوہری سرگرمیوں اور جوہری معاہدے پر عمل کے حوالے سے نگرانی کا سلسلہ جاری رہے گا۔
انہوں نے مزید کہا کہ ایران جوہری معاہدے کے مطابق اپنے وعدوں پر عمل کررہا ہے اور جیسا کہ ہم متعدد بار یہ کہہ چکے ہیں کہ اہم بات یہ ہے کہ ایران اس معاہدے کی پابندی کررہا ہے۔
واضح رہے کہ عالمی جوہری ادارے کے سربراہ نے اب تک 13 مرتبہ ایران کی شفاف کارکردگی کی تصدیق کرتے ہوئے جوہری معاہدے سے متعلق ایرانی وعدوں پر عمل درآمد کے حوالے سے رپورٹس شائع کی تھیں اس کے باوجود امریکی صدر ڈونالڈ ٹرمپ تمام عالمی قوانین اور اصولوں کو نظرانداز کرتے ہوئے گزشتہ سال مئی میں غیرقانونی طور پر ایران جوہری معاہدے سے نکل گئے۔
