ایران شام تعلقات میں غیرملکی مداخلت کی کوئی گنجائش نہیں
شامی صدر:
نیوزنور16جنوری/عرب جمہوریہ شام کے صدر نے کہا ہے کہ اسلامی جمہوریہ ایران اور شام کے درمیان تعلقات باہمی احترام پر مبنی ہیں جس میں غیرملکی مداخلت کی کوئی گنجائش نہیں۔
عالمی اردو خبررساں ادارے’’نیوزنور‘‘کی رپورٹ کے مطابق شامی صدر ’’بشار الاسد‘‘ نے دمشق میں ایرانی مجلس پارلیمنٹ کی قومی سلامتی اور خارجہ پالیسی کمیٹی کے چیئرمین حشمت اللہ فلاحت پیشہ اور ان کے ہمراہ وفد کے ساتھ ایک ملاقات میں کہا کہ اسلامی جمہوریہ ایران اور شام کے درمیان تعلقات باہمی احترام پر مبنی ہیں جس میں غیرملکی مداخلت کی کوئی گنجائش نہیں۔
انہوں نے کہا کہ ایران شام تعلقات بڑھانے کی پالیسی سے دونوں ممالک کی خودمختاری کو یقینی بنایا گیا ہے اور جو ممالک ہمارے اس مؤقف کا ساتھ دیتے ہیں ہم ان کے ساتھ غیرمعمولی تعلقات رکھتے ہیں۔
ملاقات میں ایرانی وفد کے سربراہ نے کہا کہ ایرانی اور شامی عوام عالمی قوانین کی خلاف ورزی کرنے والوں اور غیرانسانی پالیسی بشمول دہشتگردی اور ظالمانہ پابندیوں کے خلاف مقاومت کرنے میں ایک دوسرے کے ساتھ کھڑے ہیں۔
فریقین نے اس موقع پر دونوں ممالک کے درمیان سیاسی اور اقتصادی تعلقات کی مزید مضبوطی پر بھی زور دیا۔
