ایرانی نظام و استقامت نے عالمی استکبار کو حیرت زدہ کر دیا
تہران کے خطیب جمعہ :
نیوزنور12جنوری/تہران کے خطیب جمعہ نے کہا ہے کہ ایران کے اسلامی جمہوری نظام اور استقامتی محاذ سے عالمی استکبار حواس باختہ ہو گیاہے۔
عالمی اردو خبررساں ادارے’’نیوزنور‘‘کی رپورٹ کے مطابق’’حجت الاسلام و المسلمین سید محمد حسن ابو ترابی فرد‘‘ نے تہران کی مرکزی نماز جمعہ کے خطبے میں کہا کہ ایران کا اسلامی جمہوری نظام اور استقامتی محاذکہ جس نے عالمی استکبار کو حیرت زدہ کر دیا عمل صالح کے ثمرات ہیں۔
انہوں نے انسانی و اسلامی معاشرے کے اقتدار و استحکام اور اس کی بلندی نیز ترقی و پیشرفت کے لئے معاشی شعبے پر خصوصی توجہ دیئے جانے کی ضرورت پر زور دیتے ہوئے کہا کہ انسانی و اسلامی معاشرہ اگر زندگی کے تمام شعبوں میں خاص مقصد کے تحت داشمندانہ قدم اُٹھاتا ہے اور ترقی و پیشرفت کی فکر کرتا ہے تو اس کا نظریہ مغربی دنیا کی ترقی کے نظریے سے بالکل مختلف ہوتا ہے۔
خطیب جمعہ تہران نے تشخیص مصلحت نظام کونسل کے مرحوم سربراہ آیت اللہ ہاشمی رفسنجانی کی برسی کی طرف اشارہ کرتے ہوئے ایران کے نظام اسلامی کے لئے ان کی سالوں کی سعی و کوشش کی قدردانی کی۔
واضح رہے کہ تشخیص مصلحت نظام کونسل کے مرحوم سربراہ آیت اللہ ہاشمی رفسنجانی کا آٹھ جنوری دو ہزار سترہ کو حرکت قلب بند ہو جانے کے نتیجے میں انتقال ہو گیا تھا۔
