شام میں امریکی اقدامات غیر قانونی ہیں
روسی وزیر خارجہ:
نیوزنور25دسمبر/روس کے وزیر خارجہ نے کہا ہے کہ امریکہ شام کی آزادی اور قومی اقتدار اعلٰی کے بارے میں سلامتی کونسل کی قرارداد کی مسلسل خلاف ورزی کر رہا ہے۔
عالمی اردو خبر رساں ادارے’’نیوزنور‘‘کی رپورٹ کے مطابق روسی وزیرخارجہ ’’سرگئی لاوروف ‘‘نے ایک بیان میں کہا کہ امریکہ اس دعوے کے باوجود کہ وہ شام میں اپنی غیر قانونی فوجی موجودگی ختم کرنا چاہتا ہے شام کی آزادی، قومی اقتدار اعلٰی اور ارضی سالمیت کی بدستور خلاف ورزی کر رہا ہے۔
روسی وزیر خارجہ نے کہا کہ شام میں امریکی فوج صرف مسائل کا باعث بنی رہی ہے اور امریکہ شام سے فوج کی واپسی کو فرار کانام دیئے جانے سے بچنے کی کوشش کر رہا ہے۔
انہوں نے امریکہ کے مختلف یکطرفہ اقدامات منجملہ آئی این ایف معاہدے سے علحٰیدگی کے نتائج پر خبردار کرتے ہوئےکہا کہ امریکہ کا یہ اقدام ہتھیاروں کی دوڑ کا باعث بنے گا جس کے بھیانک نتائج برآمد ہوں گے۔
سر گئی لاو روف نےمزید کہا کہ امریکہ اور اس کےاتحادی صرف جاہ طلبی کے درپے رہتے ہیں اور وہ دنیا میں پائے جانے والے حقائق کو درک کرنے کی کوشش نہیں کرتے۔
