اسرائیل کی تمام ریاستی مشینری القدس کو خالص یہودیوں کا شہر بنانے کے لیے ایڑی چوٹی کا زور لگا رہی ہے
فلسطینی سماجی کارکن:
نیوزنور18دسمبر/ فلسطین کی ایک سماجی کارکن اور قبلہ اول کی محافظہ نے اپنے دورہ ملائیشیا کے دوران کہا ہے کہ صہیونی ریاست القدس کو یہودیانے کے لیے ہرحربہ استعمال کررہی ہےاور صہیونیوںنے القدس پر قبضہ مضبوط بنانے کے لیے تمام وسائل جھونک دیے ہیں۔
عالمی اردو خبررساں ادارے’’نیوزنور‘‘کی رپورٹ کے مطابق کولالمپور میں آمد کے بعد فلسطینی ذرائع ابلاغ کے ساتھ انٹریو بیت المقدس کی سماجی کارکن اور قبلہ اول کی محافظہ ’’زینۃ عمرو ‘‘ نے کہاکہ ہم صہیونی ریاست سے القدس اور مسجد اقصیٰ المبارک کے حوالے سے وحشت اور بربریت کے سوا اور کسی چیز کی توقع نہیں رکھتے۔
انہوں نے کہا کہ اسرائیل کی تمام ریاستی مشینری، اس کے سیکورٹی اور اقتصادی ادارے القدس کو خالص یہودیوں کا شہر بنانے کے لیے ایڑی چوٹی کا زور لگا رہے ہیں۔
ایک سوال کے جواب میں انہوں نے کہا کہ صہیونی ریاست کی طرف سے بیت المقدس کے فلسطینی باشندوں کو وہاں سے نقل مکانی کے لیے سخت دبائو کا سامنا ہے القدس سے فلسطینیوںکو نکال باہر کرنا بھی شہرکو یہودیانے اور اس کی املاک پرقبضے کی سازشوں کا حصہ ہےاور آنے والے وقت میں بیت المقدس کے فلسطینی باشندوں پر اسرائیل مزید دبائو ڈالے گاکیونکہ اسرائیل موجودہ حالات کو القدس اور مسجد اقصیٰ پر اپنی بالادستی کے قیام کے لیے انتہائی موزوں خیال کرتا ہے اور یہودی ریاست کے خواب کی تعبیر کے لیے مناسب موقع سمجھتا ہے۔
انہوں نے کہا کہ اسرائیل کو اندازہ ہے کہ عرب اور مسلمان حکمرانوںکو القدس اور مسجد اقصیٰ سے کوئی سروکار نہیں رہا ہے وہ اپنے اپنے مدار میں گردش کرتے ہیں اور اسرائیل کے ساتھ دوستی کرنا چاہتے ہیں انہیں فلسطینیوں پر مظالم کی کوئی پرواہ نہیں اوراس وقت اسرائیلی ریاست کے جرائم کا مقابلہ کرنے والا کوئی نہیں رہا ہے۔
ایک اور سوال کے جواب میں زینۃعمرو نے فلسطینی قوتوں میں پائے جانے والے اختلافات کو قوم کے لیے زہرقاتل قرار دیتے ہوئے کہا کہ فلسطینیوں کی باہمی رسہ کشی سے اسرائیل فائدہ اُٹھا کر اپنے نسل پرستانہ منصوبوں کو آگے بڑھا رہا ہےاور جب تک ہم ایک دوسرے کا دست وباز بن کر اسرائیل کے مقابل نہیں کھڑے ہوں گےدشمن ہم پر دباؤ ڈالتا اور ہمارے تصور سے بھی بڑھ کر تشدد کا استعمال کرے گا۔
انہوں نے کہا کہ بیت المقدس فلسطینی باشندوں کا قبلہ اول کے ساتھ مضبوط تعلق اور مسلسل ربط مقدس مقام کے دفاع میں اہم کردار ادا کررہا ہےاور فلسطینیوں کے قبلہ اول کے ساتھ ربط و تعلق کی بدولت مسجد اقصیٰ کو یہودیانے کی صہیونی سازشی پروگرام کو ناکامی کا سامنا ہے۔
موصوف سماجی کارکن نے کہا کہ مسجد اقصیٰ میں جگہ جگہ علمی مجالس کے ذریعے صہیونی ریاست کے قبلہ اول پر قبضے کے پروگرام کو ناکام بنا دیا گیا ہےاور اسرائیل جب یہ محسوس کرتا ہے کہ اس کے پروگرام کو ناکامی کا سامنا ہے تو وہ علمی اور تدریسی عمل پر حملہ کرتا ہے۔
انہوں نےکہا کہ ہمیں یہ بات فراموش نہیں کرنی چاہیے کہ اس وقت پورا بیت المقدس خطرے سے دوچار ہے صہیونی سازشوں سے بیت المقدس، اس کے تمام فلسطینی باشندے، مرابطین سب اس وقت دباؤ کا شکار ہیں ۔
انہوںنے کہا کہ بیت المقدس میں بسنے والے فلسطینیوں کی زندگی اجیرن بنا دی گئی ہےالقدس میں رہنےوالے فلسطینیوں کا سب سےبڑا مسئلہ تلاش معاش ، مکان کومسماری سے بچانا، گرفتاری، شہر بدری اور ہجرت سے بچنا ہے۔
انہوںنے کہا کہ صہیونی دشمن نے بیت المقدس میں زندگی کے تمامم شعبوں کے خلاف جنگ مسلط کررکھی ہے مقامی فلسطینی آبادی کو ایسے مشکلات میں اُلجھا دیا گیا ہے تاکہ انہیں قبلہ اول سے تعلق کی فرصت ہی نہ ملے مگر ان تمام مشکلات کےباوجود مرابطین نے قبلہ اول کے تحفظ کا عزم کر رکھا ہے۔
بیت المقدس کی سماجی کارکن اور قبلہ اول کی محافظہ نے کہا کہ بیت المقدس کے فلسطینی مسلسل صہیونیوں کی آندھی اور طوفان کی زد میں ہیں انہیں مسلسل گرفتاریوں اور تشدد کا سامنا ہے، ان کی نقل وحرکت پر کڑی نظر رکھی جاتی ہےاور اب اس سے آگے بڑھ کر انہیں تشدد، تذلیل، گرفتاریوں، بے دخلی جیسے جرائم کا سامنا ہےاورخاص طورپر مسجد اقصیٰ سے محبت کرنے والوں کے لیے یہ سب کچھ بہت مشکل ہے۔
انہوںنے کہا کہ مرابطین اور ان کے اہل خانہ کو علاج کی سہولت سے محروم کردیا گیااگر ہم اپنے حقوق کے حصول کے لیے کوئی کوشش کرتے ہیں تو القدس میں ہمارے وجود کو ختم کرنے کی دھمکی دی جاتی ہے اس طرح اسرائیل ہماری جڑوں کو اُکھاڑ رہا ہے۔
