اقوام متحدہ میں فلسطین مخالف قراردادکی ناکامی سےفلسطینی تحریک آزادی کو ایک نیا ولولہ اور حوصلہ ملا ہے
حماس کے سیاسی شعبے کے سینئر رکن:
نیوزنور 11نومبر/اسلامی تحریک مقاومت کے سیاسی شعبے کے سینئر رکن نے اسرائیل کو پورے خطےاورعالمی امن و سلامتی کے لیےسب سےبڑا اور حقیقی خطرہ قرار دیتے ہوئےکہا کہ اقوام متحدہ میں فلسطینی مقاومت کے خلاف امریکی پروگرام کی ناکامی نے فلسطینی مقاومت کامرتبہ مزید بلند کر دیا ہے۔
عالمی اردوخبررساں ادارے’’نیوزنور‘‘کی رپورٹ کے مطابق اسلامی تحریک مقاومت کے سیاسی شعبے کے سینئر رکن’’خلیل الحیہ‘‘ نے کہا کہ صہیونی ریاست مشرق وسطیٰ،عرب ممالک،عالم اسلام اور پوری دنیا کے لیے خطرہ ہے۔
انہوں نے کہاکہ صہیونی ریاست اور اس کے مظالم کو لگام دینے کی ضرورت ہے۔
انہوںنے کہا کہ اقوام متحدہ میں اسرائیل اور امریکہ کی دروغ گوئی کے باوجود فلسطینی قوم مسلح مقاومت پر کار بند ہے۔
انہوں نے کہا کہ ہم مقاومت کے فیصلے پر اس لیے قائم ہیں کہ یہ پوری فلسطینی قوم کا مشترکہ عزم ہے۔
موصوف سینئر رکن نے کہا کہ فلسطینی مقاومت نے اقوام متحدہ میں امریکی طاغوت اور تکبر کا سر نیچا کر دیا طاقت کے توازن میں تبدیلی کے باوجود امریکہ کو اقوام متحدہ میں شکست کا سامنا کرنا پڑا ہےاوراقوام متحدہ میں امریکی پروگرام کی ناکامی فلسطینی مقاومت کی کامیابی ہے۔
ایک سوال کے جواب میں انہوں نے کہا کہ فلسطینی مقاومتی قوتوں اور پوری فلسطینی قوم کے پاس اتحاد اوریکجہتی کے لیے یہ قیمتی موقع ہے تمام فلسطینی قوتوں کو امریکی اور صہیونی طاغوت کا مقابلہ کرتے ہوئے آزادی کی جدو جہد جاری رکھنا ہوگی۔
حماس رہنما نےمزید جنرل اسمبلی میں امریکہ کی جانب فلسطینی مقاومت کے خلاف قرارداد ناکام بنانے پر عالمی برادری کا شکریہ ادا کرتے ہوئے کہا کہ اقوام متحدہ میں فلسطین مخالف قرارداد کی ناکامی سے فلسطینی تحریک آزادی کو ایک نیا ولولہ اور حوصلہ ملا ہے۔
