دنیا امریکہ کی یکطرفہ پالیسیوں اُکتا گئی ہے
ایرانی وزیر خارجہ:
نیوزنور 24نومبر/ایران کے وزیر خارجہ نے کہا ہے کہ عالمی برادری امریکہ کی انفرادیت پر مبنی پالیسی سے تنگ آچکی ہے کیوں کہ اس سے آئندہ نسلوں کو سنگین خطرہ ہے۔
عالمی اردوخبررساں ادارے’’نیوزنور‘‘کی رپورٹ کےمطابق ایران کے وزیر خارجہ ’’محمد جواد ظریف‘‘ نے دورہ اٹلی کے اختتام پر صحافیوں سے گفتگو کرتے ہوئے کہا کہ عالمی بحیرہ روم کانفرنس کے موقع پر غیرملکی حکام سے ہونے والی ملاقاتوں میں ایران جوہری معاہدے اور امریکہ کی یکطرفہ پالیسی پر تبادلہ خیال کرتے ہوئے کہا کہ عالمی برادری امریکہ کی انفرادیت پر مبنی پالیسی سے تنگ آچکی ہے کیوں کہ اس سے آئندہ نسلوں کو سنگین خطرہ ہے۔
انہوں نے کہا کہ اکثر نشستوں میں تقریباً سب اس بات سے متفق تھے کہ دنیا انفرادیت پر مبنی پالیسیوں سے تنگ آچکی ہے۔
انہوں نے اس بات پر زور دیا کہ عالمی برادری کو چاہئے کہ یکطرفہ پالیسی کا مؤثر مقابلے کے لئے تیار رہے اور اسے عالمی روایت بننے کی ہرگز اجازت نہ دے۔
ایرانی وزیر خارجہ نے مزید کہا کہ عالمی بحیرہ روم کانفرنس کے موقع پر اطالوی قیادت اور بعض ممالک کے حکام کے ساتھ ہونے والی ملاقاتوں میں خطے کی تازہ ترین صورتحال بالخصوص شام اور یمن سے متعلق بات چیت ہوئی۔
واضح رہے کہ محمد جواد ظریف نے بحیرہ روم ڈائیلاگ کی سالانہ کانفرنس میں شرکت کے لئے اٹلی کا دورہ کیا تھااورانہوں نے اس کانفرنس میں خطاب کے علاوہ اپنے جاپانی، اطالوی اور روسی ہم منصوبوں اور شام کے امور میں اقوام متحدہ کے ایلچی سےملاقاتیں کیں۔