نیوزنور newsnoor

حزب اللہ لبنان کے سربراہ:

نیوزنور13اکتوبر/جنوبی لبنان میں حزب اللہ کے شہید کمانڈر عماد مغنیہ کی والدہ کی یاد میں منعقدہ مجلس ترحیم سے خطاب کرتے ہوئے حزب اللہ لبنان کے سربراہ نے مقاومت کے راستے کو قر بانیوں اور فدا کاریوں کا راستہ قرار دیتے ہوئے کہا ہے کہ ٹرمپ کی اندھی تقلید سے خلیجی ریاستیں تاریخ کےاندھیروں میں گم ہوجائیں گی۔

عالمی اردو خبررساں ادارے’’نیوزنور‘‘کی رپورٹ کے مطابق حزب اللہ لبنان کے سربراہ’’سید حسن نصراللہ‘‘ نے جنوبی لبنان میں حزب اللہ کے شہید کمانڈر عماد مغنیہ کی والدہ کی یاد میں منعقدہ مجلس ترحیم سے خطاب کرتے ہوئے کہا کہ مقاومت کا راستہ انتہائی مہنگا راستہ ہے جس میں بہترین جوانوں کی قیمتی جانوں کا نذرانہ پیش کرنا پڑتا ہے اور دنیا کی ہر تحریک اور سماج کو نفسیاتی جنگ کے دوران بہت سے بنیادی چیلنجوں کا سامنا کرنا پڑتا ہے۔
انہوں نے خطے پر ایران کے قبضہ کرنے کے بارے میں امریکی صدر ٹرمپ کے حالیہ بیان کو ایک جانب ایران کی عظمت کے اعتراف دوسری جانب خطے کے ملکوں کو ڈرانے اور زیادہ سے زیادہ اسلحہ فروخت کرنے کی کوشش قرار دیا۔
انہوں نے کہا کہ ٹرمپ اس قسم کے بیانات کے ذریعے ان ملکوں کو مزید دوہنے، مال اینٹھنے اور زیادہ سے زیادہ اسلحہ خریدنے پر مجبور کرنا چاہتے ہیں۔
موصوف سربراہ نے کہا کہ امریکی صدر ان ملکوں کے حکمرانوں اور ان کی حکومت کے دوام کے بدلے ان سے باج وصول کر رہے ہیں۔

انہوں نےامریکی صدر ٹرمپ جو کہ خلیجی ریاستوں سےباج بھی لیتا ہے اور ہر روز ان کی تذلیل بھی کرتا ہے پرخلیجی ریاستوں کی اندھی تقلید کو ان ممالک کی احمقانہ حرکت قرار دیا ۔
حزب اللہ کے سربراہ نے کسی کا نام لیے بغیر عرب ملکوں کو نصیحت کی کہ وہ اپنی پالیسیوں اور طرز حکمرانی پر نظر ثانی کریں۔
انہوں نے استفسار کیا کہ جب تمہاری دولت ختم ہو جائے گی تو ٹرمپ اس وقت تمہارے ساتھ کیا سلوک کرے گا۔
سید حسن نصراللہ نےمزید اسرائیلی عہدیداروں کے بیانات کی جانب اشارہ کرتے ہوئے کہا کہ لبنان کے بعض مقامات کی تصاویر شائع کر کے دشمن عوام میں خوف و ہراس پھیلانا چاہتا ہے۔