نیوزنور newsnoor

ترک صدر:

 نیوزنور27ستمبر/ترکی کے صدر نے کہا ہے کہ مقبوضہ بیت المقدس اور مسجد اقصیٰ جو ہمارا قبلہ اول ہے کو دہشتگردوں اور غاصبوں کے حوالے نہیں کیا جاسکتا۔

عالمی اردو خبررساں ادارے’’نیوزنور‘‘کی رپورٹ کے مطابق امریکی شہر نیویارک میں ایک تقریب سے خطاب میں ترک صدر ’’رجب طیب اردوگان‘‘نے کہا کہ ہمارے نظریے اور عقیدے کے مطابق ظلم کو قبول کرنا بھی ظلم کرنے کے مترادف ہے ہم نے اپنی عزت وناموس کی بقاء کے لیے جانوں کی قربانیاں دی ہیں۔

ترک صدر نے جمہوریت کے علم بردار بڑے ملکوں کی فلسطین کے حوالے سے مجرمانہ غفلت پر مبنی پالیسی کو کڑی تنقید کا نشانہ بناتے ہوئے کہا کہ جمہوریت کے علم برداروں کو فلسطینی شہریوں کے وحشیانہ قتل عام پر زبان کھولنے کی ہمت بھی نہیں ہوتی بلکہ انہیں صرف غاصب صہیونی مظلوم دکھائی دیتے ہیں۔

ترک صدر کی جانب سے یہ بیان ایک ایسے وقت میں سامنے آیا ہے جب امریکہ کی طرف سے کھلے عام قضیہ فلسطین کے تصفیے کی سازشیں کی جا رہی ہیں اور بیت المقدس کواسرائیل کا دارالحکومت قرار دیا گیا ہے۔

ترک صدر نے کہا کہ ان کا ملک شمالی شام میں دریائے فرات کے مشرقی کنارے کے علاقوں کے حوالے سے مؤثر اقدامات کا پابند ہے جس طرح فرات کی ڈھال اور زیتون کی شاخ آپریشن کےدوران محفوظ زون قائم کیے گئے اسی طرح ادلب میں بھی محفوظ زون قائم کرنے کے پابند ہیں۔

انہوں نے کہا کہ سلامتی کونسل اور عالمی ادارے شام، بوسنیا، کوسوو، روانڈا، یمن اور فلسطین میں مسلمانوں پر ڈھائے جانے والے مظالم پر خاموش ہےجبکہ ترکی نے شام کی مظلوم عوام کے لیے سب سے بڑھ کر امداد فراہم کی اور ان کا بوجھ اُٹھایا۔

طیب اردوگان نے مزید کہا کہ ہم نے شامی عوام کے لیے اپنے ملک کے دروازے کھول دیے اور اب ہم شام میں جنگ ختم کرنے کے لیے سفارتی مساعی میں ہرممکن تعاون کے لیے تیار ہیں۔