محرم الحرام کا پیغام اتحاد بین المسلمین ہے
ملی یکجہتی کونسل سندھ کے صدر ونائب امیر:
محرم الحرام کا پیغام
اتحاد بین المسلمین ہے
نیوزنور12ستمبر/ملی یکجہتی کونسل سندھ کے صدر ونائب امیرنے کہا ہے کہ محرم الحرام میں مذہبی رواداری وہم آہنگی اور باہمی اخوت و محبت کے ماحول کو ہر صورت میں برقرار رکھا جائے۔
عالمی اردوخبررساں ادارے’’نیوزنور‘‘کی رپورٹ کے مطابق ملی یکجہتی کونسل سندھ کے صدر ونائب امیر جماعت اسلامی پاکستان’’ اسد اللہ بھٹو‘‘محرم الحرام میں تمام مکاتب فکر کے علمائے کرام وحدت، یگانگت، یکجہتی اور اخوت و بھائی چارے کا جذبہ پیدا کرتے ہوئے اس محترم مہینے کو امن و سکون سے گزارنے کا پیغام دیں تاکہ نواسہ رسول حضرت امام حسین علیہ السلام کے امن، یگانگت اور اخوت اور بھائی چارے کے حقیقی پیغام کو زندہ کیا جاسکے۔
انہوں نے کہا کہ یہ سب کی مشترکہ ذمہ داری ہے کہ مذہبی رواداری و ہم آہنگی اور امن و امان کی صورتحال کو بہتر رکھنے میں تمام مسالک و مکاتب فکر کے علمائے کرام،مشائخ ،ذاکرین اور ان سے وابستہ افراد اپنا کردار ادا کریں اور یہ حکومت اور قانون نافذ کر نے والے اداروں کا بھی فرض ہے کہ وہ اپنی ذمہ داری پوری کریں اور امن و امان کے قیام کو یقینی بنائیں۔
اسد اللہ بھٹونے مزید علمائے کرام و ذاکرین سے اپیل کی ہے کہ وہ اپنے خطبات، تقاریر اور مجالس میں باہمی اخوت و محبت اور مذہبی رواداری کے جذبات کو فروغ دیں اور اتحاد و یکجہتی کا درس دیں کیونکہ ہمارا اتحاد اور یکجہتی ہی دشمن کی سازشوں کو ناکام بنا سکتا ہے۔
