ایرانی سفارتی مشن پر حملہ ہم پر حملہ ہے
عراقی وزیرخارجہ:
نیوزنور11ستمبر/عراق کے وزیر خارجہ نے کہا ہے کہ بصرہ میں شرپسند عناصر کی جانب سے ایرانی قونصل خانے پر حملہ در اصل ہم پر حملے کے مترادف تھا۔
عالمی اردو خبررساں ادارے’’نیوزنور‘‘کی رپورٹ کے مطابق عراقی وزیرخارجہ’’ابراہیم الجعفری‘‘نے عراق کے نشریاتی ادارے کو انٹریو دیتے ہوئے کہا کہ ایرانی سفارتی مشن کے خلاف بعض عناصر کے غلط اقدام کو عراقی قوم اور حکومت سے منسلک نہیں کیا جانا چاہئے۔
انہوں نے کہا کہ علاقے میں لوگ اپنے حقوق کے لئے مظاہرے کررہے تھے جبکہ بعض ملک دشمن عناصر نے مخصوص ایجنڈے کے تحت یہ بازیبا قدم اُٹھایا جس سے نہ صرف عراق کو نقصان پہنچا بلکہ ایران کے ساتھ تعلقات کو خراب کرنے کی بھی کوشش کی گئی۔
عراقی وزیر خارجہ نے کہا کہ ہمارے ایران کے ساتھ تعلقات تاریخی اور دیرینہ ہیں جبکہ دونوں ممالک کے درمیان جغرافیائی اور تاریخی مشترکات ہیں۔
انہوں نے کہا کہ ایران اور عراق کے درمیان 1200 کلومیٹر طویل سرحد واقع ہے اور دونوں کے درمیان مشترکہ مفادات اور باہمی احترام پر رشتہ قائم ہے۔
ابراہیم الجعفری نے اس بات پر زور دیا کہ ایرانی مشن پر حملہ کرنے والے بزدل عناصر کو دیگر عوامی مطالبات کے لئے مظاہرہ کرنے والوں سے الگ رکھنا چاہئےاس واقعے میں ملوث عناصر کی جلد شناخت اورگرفتاری عمل میں لائی جائے گی تا کہ پتہ چلےیہ کون عناصر تھے جنہوں نے ایران عراق تعلقات کو خراب کرنے کی سازش کی۔
انہوں نے کہا کہ ہم ایرانی قوم کا ہمیشہ احترام کرتے ہیں ہمیں ان سے بے حد پیار ہے اور ہم ایرانیوں کو یقین دلاتے ہیں کہ شرپسند اور منحرف عناصر کو ایران اور عراق کے درمیان مضبوط رشتے اور تعلقات کو خراب کرنے کی اجازت نہیں دی جائے گی۔
ابراہیم الجعفری نےمزید اسلامی جمہوریہ ایران بالخصوص ایرانی قیادت اور رہبر معظم انقلاب اسلامی کو خراج تحسین پیش کرتے ہوئے اس بات پر زور دیا کہ ہمیں مشترکہ دشمنوں اور اسلام مخالف عناصر کو ہمارے برادرانہ تعلقات کو خراب کرنے کے لئے موقع فراہم نہیں کرنا چاہئے۔
