ایران اور ترکی کے عالم اسلام میں مشترکہ مقاصد ہیں
امام خامنہ ای :
نیوزنور08ستمبر/رہبر معظم انقلاب اسلامی نے یکجہتی اور اجتماعی تعاون کو اُمت مسلمہ کے لئے ضروری قرار دیتے ہوئے فرمایا ہے کہ اسلامی جمہوریہ ایران اور ترکی کے درمیان عالم اسلام میں مشترکہ مقاصد ہیں۔
عالمی اردو خبررساں ادارے’’نیوزنور‘‘کی رپورٹ کے مطابق رہبر معظم انقلاب اسلامی ’’حضرت آیت اللہ العظمی سید علی خامنہ ای‘‘ نے تہران میں ترک صدر رجب طیب اردوان کے ساتھ ایک ملاقات میں یکجہتی اور اجتماعی تعاون کو اُمت مسلمہ کے لئے ضروری قرار دیتے ہوئے فرمایا ہے کہ اسلامی جمہوریہ ایران اور ترکی کے درمیان عالم اسلام میں مشترکہ مقاصد ہیں۔
آپ نے فرمایا کہ آج عالم اسلام کو سب اہم اور ضروری بات اسلامی ریاستوں کے درمیان یکجہتی اور یک دلی ہےاوریقینا عالم اسلام کے درمیان باہمی اتحاد سے علاقائی مشکلات پر قابو پایا جاسکتا ہے۔
آپ نے فرمایا کہ عالمی سامراجی قوتیں بالخصوص امریکہ اسلامی ریاستوں کے درمیان اتحاد اور قریبی تعاون سے خوفزدہ ہیں اور انہیں ایک طاقتور اسلامی بلاک کی تشکیل سے بھی تشویش ہے۔
رہبر معظم انقلاب اسلامی نے فرمایا کہ ایران اور ترکی خطے کے دو طاقتور اور باعزت ممالک ہیں جن کے عالم اسلام میں مشترکہ مقاصد ہیں لہذا دونوں ممالک کو چاہئے کہ سیاسی اور معاشی شعبوں میں مشترکہ تعاون کو مزید فروغ دیں۔
آپ نے فرمایا کہ اسلامی ریاستوں کے خلاف امریکی دشمنی اور سازش کی اصل وجہ اُمت مسلمہ کی طاقت ہے۔
امام خامنہ ای نے مزید فرمایا کہ مسئلہ فلسطین ہمیشہ ایک اہم مسئلہ ہے جس سے ہرگز غافل نہیں ہونا چاہئے۔
ملاقات میں ترک صدر نے کہا کہ خطے کو سنگین صورتحال کا سامنا ہے لیکن ہمیں اُمید ہے کہ اسلامی ریاستوں کے اجتماعی تعاون کی مدد سے علاقائی مشکلات کا خاتمہ کیا جاسکتا ہے۔
رجب طیب اردوان نے مزید کہا کہ آج کی صورتحال کی وجہ اسلامی ممالک میں عدم اتحاد اور تفریق ہے اور دوسری جانب اسلامی ممالک کے خلاف مغربی ممالک کے غیرامتیازی سلوک نے اس صورتحال کومزید گھمبیر کردیا ہے لہذا اسلامی ریاستوں کے درمیان بالخصوص ایران اور ترکی کے درمیان ہم آہنگی اور قریبی تعاون کو مزید بڑھانا ہوگا۔
